香港現時正值風雨飄搖嘅時候，支持學生爭取真普選嘅「黃絲帶」陣營與力撐政府同警察嘅「藍絲帶」互相對壘。而噚日九大證券商會代表聯同立法會金融服務界議員張華峰就齊齊帶上藍絲帶開記者會，除咗表達佔中對業界帶來嘅影響，亦順手表達佢哋撐政府同警察嘅立場。
不過，張華峰與中資證券業協會會長閻峰身上面雖然釘上藍絲帶，閻峰仲着埋藍色恤衫㖭，但細心啲睇，佢兩位仁兄都打咗條黃色領呔喎，唔通明反佔中，暗撐學生？
閻峰就急急解釋話，條呔其實係佢哋協會嘅會呔，佢仲聲稱，唔知黃色係代表撐學生。而張華峰就話雖然學生好有理想，但都唔應該以違法方式爭取民主。九大證券商會嘅代表喺中環大會堂美心皇堂開完記者會後，就喺同一地點舉行國慶晚宴。