科大經濟系教授雷鼎鳴上周五用港股市值推算，佔中令每名港人唔見5萬銀，當堂嚇親街坊。之不過，恒指過去兩日反彈番，香港人褲袋又多番2.5萬銀，呢筆錢又應該入邊個數先？
身兼政改13學者方案成員嘅雷鼎鳴之前話，恒指每跌1點等於名義財富唔見10億元，恒指喺佔中首兩日跌咗745點，打個五折推算財富蒸發7,000億元。根據呢個邏輯，雖然佔中未完，但過去兩日大市反彈381點，市值收復一半，即係財富又多番3,500億元喇！
華華打電話畀教授請教，可惜佢貴人事忙匆匆收線無回應。不過唔緊要，同樣係科技大學學者出身嘅財庫局局長陳家強噚日現身國慶晚宴，就撐雷鼎鳴係著名學者、言論有參考價值云云，咁佢buy唔buy呢？局長就笑而不語嘞，差在未講一句「你懂的」。