928催淚彈、黑幫旺角掃場，令過去嘅周末心情灰到爆。不過香港人轉數真係奇高，竟然諗到唱生日歌趕走挑機嘅反佔中人士，加上「愛字頭」首撐警膠歌出奇的好笑，心情又突然輕鬆番！
學王維基話齋，所有嘢都係命運安排。如果冇雨傘革命，真係冇諗過坐的士、小巴唔收錢；人人自發買物資、買飯去畀公家；仲要有人跌錢喺地下，上面竟然會黐住張紙叫人唔好執。香港曾為炒iPhone而停頓兩粒鐘，但我今日竟然可以好自豪咁同人講，香港人係可以唔貪錢的！呢個概念，簡直顛覆大家嘅一貫認知。雖然目前氣氛暫時緩和，但大家唔可以鬆懈，短期內變數仍然好多，大家一齊撐住。
港股都一樣，市場氣氛都好番啲。噚日碼頭股當炒，大連港（2880）可睇高一線。
首先，國務院日前正式批准，天津港口岸新一輪擴大對外開放計劃，令天津港（3382）大升兼破位。阿爺一早有意大搞海運業，今次上位嘅係天津港，令大連港多咗想像空間。
雖然雨傘革命或令阿爺好嬲，但我唔信因此叫停滬港通。你冇理由天真地覺得滬港通純為香港人着想，自己一點好處都冇啩？所以AH股折讓仲有得炒。大連港A股較H股溢價高達78%。概念夠，加上同業已破位，大連港可望收復失地。
Fifi
http://www.facebook.com/lovefrystock
本欄逢周二、四刊出