肥佬黎連日喺唔同佔領區出現，為抗爭中嘅學生打氣之時，亦瞓身留守唔撤退！好似周一凌晨時分，佢都身在佔鐘現場，同何俊仁、李永達一齊作戰，直至3點幾先走。有佔鐘者發現，好撐佔領學生嘅「嘉勳教育」英文補習老師Calvin Sun當晚路過時，圍埋同肥佬黎等人吹水。佢哋講啲乜？除咗圍埋討論吓𠵱家嘅政局，以及運動何去何從，據知肥佬黎都問過，補習事業前景如何？對各行各業發展都好關心咁噃！
其實漫漫長夜，肥佬黎點打發啲時間？有目擊者話，佢不停睇外國雜誌同書，當然機不離手，同唔少讀者一樣不停睇動新聞，update佔領事件嘅最新發展。