為備戰一連兩場對新加坡同阿根廷嘅國際友誼賽，香港足球代表隊噚日喺掃桿埔球場開操，除咗一如以往未齊人外，流浪前鋒林學曦嘅表現飄忽，加上比賽態度唔夠積極，收操後仲俾教練金判坤「照肺」㖭！
發最後通牒唔掂即踢走
仁川亞運圓滿落幕之後，港隊教練金判坤仲未有得唞，事關大港腳今個禮拜五鬥完新加坡，下個禮拜二仲有場足總百周年紀念賽，迎戰有美斯領軍嘅世界2哥阿根廷，噚日就嗱嗱聲復操。不過，早兩日有港超聯，都唔係好齊人練波，只係得18個人出席；除傑志較齊腳外，飛馬有鞠盈智請假，東方就因為出外集訓，後衞李志豪同門將葉鴻輝都要今日先歸隊，而科夫同陳肇麒就因傷冇跟足操練。
對於陳七嘅傷勢，金帥表示會密切留意，會唔會補選人腳就未知，但佢就提到好一段時間冇徵召嘅入籍兵高梵，近排喺中甲有得踢，唔排除搵佢返港跟操，備戰下月嘅東亞盃外圍賽。雖然噚日係開操首課，只係輕鬆操咗個半鐘，但金帥依然好火，捉咗流浪前鋒林學曦，單獨訓話咗成10分鐘。金帥事後解釋︰「我有入場睇流浪對南華嘅聯賽，學曦嘅表現唔好，比賽態度亦唔積極，水準咁唔穩定，好難再用佢，呢個係最後機會，希望佢好自為之！今次係三代球員嘅組合，每個球員都應該喺比賽同練習上表現出飢渴感；即使年輕球員實力上或有不及，但態度好嘅話我都唔介意畀佢哋落場。」
識睇，一定係睇足英台【英波Live】：
http://soccer.appledaily.com
http://bit.ly/engballlive