講多單關於佔中嘅料，新近聽聞，「梁粉」恒隆地產（101）主席陳啟宗原來對佔中相當緊張，上周日佔中啟動後，上星期一、二，恒隆原本喺中環返工嘅同事，部份被安排去後勤寫字樓，直至上周五先去番中環返工。
恒隆總部喺中環渣打銀行大廈頂層，即係喺滙豐總行旁邊，雖然話公司為佔中啟動應變機制，叫部份同事去第二度（聽聞位於鰂魚涌）嘅後勤寫字樓返工都好合理，但係講緊嘅係恒隆喎，陳啟宗係忠實「梁粉」，上月底佢仲盛讚梁振英有正氣、有能力，喺佢認識嘅港人當中，擁有梁振英能力嘅人，佢未見過第二個。
講到咁，陳啟宗應該對梁振英處理佔中活動好有信心，唔使啟動應變機制先啱㗎。喺中環嘅外資證券行分分鐘億億聲上落，都只係每日監察情況，然後叫員工準時返工咋喎！