佔中啟動超過一星期，財經界好多人唔係反對，就係選擇唔出聲，包括證券學會、中資證券業協會等九大金融業商會嘅代表今晚將會齊集中環大會堂美心皇宮，不過大家唔好諗多咗，佢哋唔係商量點樣叫CY收科，而係「去飲」賀國慶，佔中清場與否，佢哋呢餐都會繼續。
查實國慶正日都過咗幾日，今晚先賀國慶會唔會遲咗啲呀，慶生通常都係提早或正日進行㗎喎，佢哋仲要揀喺中環嘅大會堂美心舉行，出席嘉賓包括早兩個月先出任香港中聯辦前副主任嘅仇鴻、財庫局局長陳家強、就快退休嘅財庫局常秘區璟智同埋港交所（388）主席周松崗等等。
身為搞手嘅證券學會會長李細燕指，佔中唔會對晚宴有影響，無論政府有冇清場，今晚都會繼續舉行呢個愛國派對咁話。唔知佢哋又預唔預一班示威者去贈興呢？