雷神係過江龍之首，蔡明紹則曾係首席華將，兩人呢日喺三T尾關合演一場大戰，結果平分秋色不分勝負，成為雙冠軍。第六場四班1400米，雷神放棄由自己新上名之「珍珠旺」，揀騎季內初出蘇保羅馬房之「天笑」被捧成頂頭大熱，蔡明紹則幫師傅告東尼騎匆出之「綻放美麗」，前駒追、後駒放，卒之一齊衝線不分軒輊，跑出今季首次平頭冠軍，第三名係上次包尾而今次換柏寶之「匯聚力量」。
「天笑」的頭馬獎金被「綻放美麗」分一半，但苦戰兩季總算出到頭。至於「綻放美麗」鞍上人蔡明紹手風順番，連續第二個賽日贏東廐馬，師徒合作威力重現。「綻放美麗」上季中至今已四捷，馬主乃莎莎老闆郭少明的千金郭詩慧，可謂旺氣逼人，亦是郭氏家族今季首度贏馬，咁啱主要生意對手卓悅老闆葉俊亨於對上一場贏「齊大勝」，卓悅、莎莎包辦第五口孖寶，何其巧合。
郭少明手抱孫兒一起拉頭馬，郭少明說：「影相分勝負時我十分緊張，因為『天笑』的鞍上人是莫雷拉，我擔心雷神鬥贏『綻放美麗』，令後駒影輸，好彩兩駒平頭冠軍，可說皆大歡喜。」