佔中變成「佔鐘」，再遍港開花，最後暱稱為「雨傘革命」，很多人都始料不及。股市都一樣，回頭來看，投資者亦低估了佔中對港股的影響，事實上，唔少人都曾抱有不成氣候的想法，我自己都一樣，見到手頭上的系統出了沽空訊號，理應沽空，但也被洗了腦，只做對沖，尤幸留有兩手準備。大部份人估錯，點算？遂提議買入大量極價外put，此之謂當日的標題「黑白天鵝兩手抓」，結果黑天鵝果真出現，極價外期權全部入晒價，希望當日有聽取意見者，在最近唔多開心的日子，賺番錢降下火。既然韻律與大市同步，順理成章我會試圖猜猜後市的端倪，不過賣個關子，先與大家分享自己上周的一個做法。
中期底快形成
在十一假期前，我手上仍有唔少股票，只靠期權對沖，我唔怕大市急跌，因對沖突左，但係我怕大市下跌會令個股炒家突然恐慌，不理性沽貨，致使觸及我個股的止蝕位。止蝕位觸及，理應止蝕，但由於供求失衡，強要止蝕，會自己人踩人，唔止蝕又無險可守，可謂進退失據，既然如此，我就趁假前反彈至23000附近時，與學生分享自己的一個做法，我將手頭上較細較散又唔係垃圾股的個股平倉（因垃圾股同大市關係疏離），然後再動用平倉後得回來了的七分之一資金，買入約10倍槓桿的大股衍生工具，因為如果假後大市下跌，這七分之一資金多半唔見兩三成，但勝在唔使點理，因為唔會係無底洞。想平衍生有莊，點都有價平（最多差啲）。但如果正股，則唔知平好還是唔平好。相反，如假後無事，率先反彈的應是大股，所以，我call大了些少，可以彌補了大股波幅的不足，可謂進可攻、退可守。筆者甚少沾手窩輪，可能一年只有幾次，其實攻之餘，守都可以用，不過，只宜速戰速決。本周若大市不升，我便會將衍生轉回個股，由於大調整式股災是照妖鏡，經此一劫，揀股易很多，只是通常劫後已無錢買，我最低限度保有七分之六資金，可放心買入心儀愛股。
最後，當然要講講後市，上周五唔少專欄都叫唔好隨便接刀，我的看法就有點不同，既然大市在高位之時，有醒目錢落了注在佔中，最佳收割時機，當然在CY發言之後，所以未開市已發簡訊給學生，可考慮平淡倉博反彈，當日由低位升了500點，可謂喜出望外。咁，是反彈還是新升浪之開始，現在講有點言之尚早，但既然係黑天鵝，即係無乜人估到，而當日無人驚佔中，現在突然被殺個措手不及，當然會驚過龍，圖表上亦已營造恐慌之象。現在佔中人士與政府像長期作戰，理應對港不利，估大市從此好，又是另一個黑天鵝，但我認為股市有機會柳暗花明，所以我覺得一個中期底將會形成，只要大市持續反彈，我相信差唔多可博見底了，我估計下星期本欄仍應來得及通知大家，這個星期我會開始換入強勢股，等市勢肯定，下周再大舉入市，祝人人平安，天佑香港。
張士佳