蔡東豪老闆高振順上星期決定委任自己個女高穎欣（Samantha）做精電國際（710）執行董事兼掌櫃，呢位Samantha今年35歲，同好多富二代一樣，大學畢業後喺滙豐、摩根士丹利同埋摩根大通做過賓架，樣貌亦相當省鏡，驟眼睇，仲有七分似三色台嘅藝人梁靖琪㖭呀。
Samantha與梁靖琪都有個巴弊爸爸，高振順活躍股壇，最叻玩財技，除精電，仲持有先豐（500）、瑞東（376）同埋中國風電（182）等多間上市公司，Samantha喺金融海嘯後就離開投資銀行，去中國風電幫阿爸手。
「80後」梁靖琪嘅爸爸雖然唔係富豪，但效力三色台超過40年、係早前退休嘅無綫前戲劇製作總監梁家樹，喺演藝界頗有地位。
梁靖琪嘅長直髮look，真係好似Samantha，兩人企埋一齊都幾似孖妹。