佔中超過一星期，財經界唔少人擔心阿爺會延期推行滬港通作為懲罰，事實上，阿爺要拖嘅話，亦大把理由，淨係話中港兩地證監會未傾掂數就已經得，難怪一班股市好友腳震震。好在上海交易所依然表現積極，總經理黃紅元已經帶隊來港，今朝會喺交易所展覽廳同一班有份參與滬港通嘅本地券商代表開會，表面上繼續為滬港通做準備。
上交所今年8月已經派過高層來港會見本港中小券商，黃紅元上次冇嚟，今日主要同班有份參與滬港通嘅券商交流最新情況，兼且了解香港券商面對乜嘢問題。呢個會喺佔中啟動前已經安排好，並唔係針對佔中嘅緊急會議，不過𠵱家佔中啟動，券商又緊張滬港通延期開通，今日肯定大把人關心幾時開車。
立法會金融服務界議員張華峰就覺得「政治歸政治，經濟歸經濟」，相信阿爺唔會因為佔中而打亂滬港通推出嘅時間表。