呢場遍地開花嘅佔領運動，學生顯然係主導，帶領咗一個社運新趨勢，而隨住政府清場壓力越嚟越大，幾間大專院校校長同教職員，陸續去到佔領場地探望學生。綜觀呢幾日佔領史，港大同中大原來有鋪孖咇出巡癮；政界中人話兩大一齊發功，公關策略同影響力都贏晒！
快過其他校長到場
作為兩間本地最知名嘅高等學府，港大同中大喺佔領運動上共同進退，無論係校長同醫學院阿頭都孖必出場。喺上周四警方開槍清場消息瘋傳之時，港大校長馬斐森同中大校長沈祖堯一馬當先，夜晚直踩特首辦外，喺熱到衫都濕晒情況下，輪流揸咪勸導學生冷靜，留守學生確實冇衝喎，有政界中人當晚都大讚兩大校長魅力非凡！至於其他大專院校校長，直至周六先去探班，慢咗幾個馬鼻喎！
而喺前日深夜再傳政府清場之際，輪到港大醫學院院長梁卓偉同中大醫學院院長陳家亮，齊齊着白衣喺「佔鐘」現場出動，憂心忡忡話情況不妙，希望學生早點歸去。八方唔知有幾多學生，會被兩大阿頭連番出招而打動，放棄留守，只知有政界中人話呀，平日喺學術範疇同國際排名上競爭激烈嘅兩大，今次喺佔領運動孖咇出巡，好好合作之下冇分高下！
李八方
mailto:[email protected]
