車行經紀同地產代理一樣，淨係靠底薪都未夠開飯，目標梗係扑中大單食大茶飯。咁點解股神畢菲特肯搏去捱，連車行經紀都撈埋？
巴郡上周四收購美國最大私營汽車經銷商Van Tuyl Group，無公佈作價。唔好睇小公司規模細，呢間總部喺德州由家族經營嘅車行，全美國只係得78個經銷點，每年收入卻高達702億港元。
畢菲特喺致股東的信中話鍾意備有經濟護城河嘅行業，意思指幫公司築起一條護城河防範競爭對手。獲股神收歸旗下後，車行慢慢同巴郡築起經濟護城河。首先，巴郡旗下保險公司GEICO近水樓台，可趁機擴展汽車保險業，締造賣車連車保一條龍服務。公司又可以搞埋維修汽車、汽車用品生意，開創經常性收入。想進一步壯大業務，巴郡旗下北美鐵路運輸公司Burlington Northern同私人飛機租賃公司NetJets亦有機會融入。
星晨資料指美國汽車經銷行業分散，全美十大汽車經銷商嘅新車銷售，加埋都只係佔市場一成，反映行業發展潛力大。好明顯，巴郡嘅最終目標，就係鋪路整合美國汽車經銷行業。股神上星期四喺訪問都爆響口有計劃收購其他汽車經銷商，當日帶動一眾汽車經銷商股份上升，其中AutoNation同Lithia Motors立即踩油急升6%及10%。股神點止收購車行咁簡單，而係買間車行贏間廠。
C+B
本欄逢周一刊出