無人指揮之佔領行動，如何收兵？據政府消息人士向西方傳媒放風（彭博、紐時等），政府願意與佔領人士鬥耐性，如果佢地衝擊警察總部或政總就另當別論。三國演義有孔明戲司馬懿嘅故事，諸葛亮命人送女人衣服俾司馬懿，擺明侮辱，要刺激司馬懿開城門迎戰，但司馬懿一於忍忍忍，不戰就是不戰，連諸葛亮都無符，最後只好撤退圍城兵馬。依家學聯學民等公開要求梁振英辭職先至有偈傾，當然係強人所難。梁振英為公（阿爺）為私（個人前途），肯定不會自動請辭，曾鈺成更講到即使CY要辭，中央都唔會俾佢辭，故此「佔領運動」要求CY辭職，差不多係等於送件女人衫俾佢着，有意羞辱佢啫。
不辭，不戰（即不叫警察清場），意欲何為？讀過古文《鄭伯克段于鄢》就會有靈感，梁振英當自己係鄭伯，群眾係細佬段，阿段跋扈不得人心之後，鄭伯就出兵掃蕩矣。現代解釋就是：等佔領群眾師老兵疲，阻塞交通要道令其他市民煩厭，商店攤販煩厭，酒店食肆為生意下降而發火之時，市民與群眾之嗌交衝突必然愈演愈烈，不排除會有兩派人士大打出手，弄至秩序大亂，你睇吓旺角區在上星期五已有反佔中人士拆佔領群眾之帳篷，故意挑起衝突就知道呢啲事會隨時發生，更何況後面可能有人暗地裏策劃挑撥呢，王國興在星期五之建制派記者招待會講到青筋暴現，聲色俱厲，係想傳遞信息吖嘛，自有愛港力中人明白。
佔領者無組織，無指揮，從政府角度睇，最易逐個擊破，先搞市民分裂，好似泰國咁，黃衫軍與紅衫軍互鬥，搵林鄭及政改三人組與學聯對話，其實一定冇結果，大家做吓騷而已，政府既然不會/不能/不敢改變人大常委決定，與學聯有甚麼可談？拖延時間嘅啫，左丁山認為時間對佔領運動不利，愈拖長愈多其他人出嚟指罵示威群眾，蘇錦樑星期五咪拉埋一堆商會人士吐苦水，埋怨冇生意，曾俊華見記者講經濟損失，呢啲招數陸續有嚟，香港示威群眾被CNN稱為世界上嘅nicest protesters，雨傘感動全世界，但在社會現實之下，梁振英嘅拖延戰術係會對佔中運動構成巨大壓力嘅。