【雨傘革命】無綫近年在節目中滲出的維穩態度越來越着迹，昨日節目《東張西望》派出攝製隊到深水埗訪問電影《唐伯虎衝上雲霄》的男主角杜汶澤，幕後人員發現阿澤身上黑tee掛上力撐佔中的黃絲帶，竟要求他除下才出鏡，即時辣㷫阿澤爆粗大罵，事後節目雖妥協，但鏡頭專登避開阿澤身上黃絲帶。面對大是大非，阿澤拋低私人恩怨，前晚突然在facebook跟宿敵黃秋生和好，大方轉貼秋生關心香港，撐學生的言論。
近日「雨傘革命」喚起港人團結向政府公民抗命，佔中運動已遍地開花，但前日反佔中人士突聯群結黨湧出有所行動，當中滲入惡勢力招兵買馬，以暴力圍毆佔中人士，引發流血衝突。學聯前晚發聲明譴責政府縱容暴徒打擊佔中，宣佈擱置跟政務司司長林鄭月娥的對話。
阿澤昨日往深水埗出席電影《唐伯虎衝上雲霄》宣傳，不但穿上黑tee，還戴了黑帽及黑膠框眼鏡，黑tee更扣上黃絲帶，以實際行動撐學生。活動後，無綫節目《東張西望》派出主持容羡媛採訪阿澤，未開始阿澤便變臉，怒氣向現場記者爆粗投訴，原來昨有幕後工作人員要阿澤除黃絲帶才出鏡，難怪阿澤火爆大鬧：「TVB唔畀戴黃絲帶，黐X線！」其後該節目雖妥協，不過錄影期間鏡頭只拍阿澤臉部特寫，完全避開他的黃絲帶，阿澤受訪後說：「鍾意播就播，唔鍾意播就唔播！」
阿澤秋生放低私怨
《唐》片上畫撞正佔中，票房截至前日為止暫收213萬，阿澤說：「𠵱家共度時艱，點都應該體諒學生。又唔係一世人拍一次戲，大是大非之前，生意人都要體諒，我不嬲票房冇所謂。」
公民抗命在fb引爆unfriend潮，阿澤直認有unfriend人：「唔係因為你立場，而係你智商。我friend list中都有不同立場的人，智商同感冒都一樣，好易傳染。」今年初阿澤跟黃秋生爆不和，可是前晚卻見阿澤有轉貼秋生撐學生言論和讚他的專頁，阿澤說：「呢個時候，生意私怨放埋一邊先。我睇佢講咗好多日，意見好有見地，無論性格上唔夾、立場上唔同都好，你會見到嗰個人心地好，冇辦法唔去相信佢講嘅嘢。」但阿澤避答兩人是否再是朋友。
阿澤沒親到佔中場地聲援，他說：「大家都知我乜嘢處境，好多人以為藝人講嘢好簡單，以為怕咗搵唔到食，我落去支持可以做到幾多？定係加添咗麻煩畀大家？好似發哥（周潤發），係香港最紅藝人，𠵱家發咗聲都唔會聽，唔講其他嘅嘢嘅梁朝偉都出聲，結果政府都係唔聽。藝人嘅說話已經唔係想像中咁大，政府都咁冷漠，咁我杜汶澤又算係乜？」
採訪：陳杰、盧妹
