今季各騎師之中，雷神一如預期暫時跑出，話咁快已經贏咗11場頭馬；對於佢嘅表現，大家都唔意外，反而估唔到嘅係何澤堯令人有驚喜，喺高手林立之下，殺出一條血路，贏得六場頭馬，是成績最佳華將；「喜勁駒」留後恰度下擊敗13屆冠軍韋達嘅「風采」固然唔容易，而夥拍「喜寶駒」贏三級賽國慶盃，更有大將之風，睇得出佢嘅騎功大有進步。
何澤堯除咗事業，愛情亦得意，記得去年6月19日堯仔騎「萬事盛」連環墮馬，佢位純天然女友當場流淚，表現憂心，就知有幾關心堯仔。而呢近兩年每個賽日，女友幾乎例牌入場默默支持，可以話係堯仔嘅最大動力。
今次沙田日馬，堯仔又有機會再添佳績，好似第三場「歡悅星」，原來上次比賽途中，堯仔嘅眼罩黏上大量泥濘，大大影響發揮，咁都追入第五，可見隻馬今季確有進步。至於第五場「金威勝」，上月尾季內初出，細粒馬孭133磅咁惡頂，都追入第四已試準，今次升班換堯仔大減22磅，加埋個一檔，睇嚟堯仔又可以同女友慶祝喇！