第1次參加亞運就攞到公路賽銅牌,記者都用「黃金寶接班人」、「阿寶二世」來形容我,我嘅反應係:「唔要做阿寶」,唔係我睇唔起阿寶,佢嘅神級地位無人能及,係唔想畀壓力自己,覺得做自己比追住人哋嘅影子仲緊要。
曾被彩虹衣壓力拖垮
講真,細個真係有諗過做黃金寶(右),要好似佢咁犀利。大個咗就覺得唔係隨便話做阿寶就做到,暫時唯一同阿寶有少少似嘅,係我2012年贏咗世青賽記分賽冠軍,攞到彩虹戰衣;當時可以同曾攞彩虹戰衣(成人賽)嘅阿寶好似近咗少少,有啲飄飄然。
但到2013年,帶住世青個金牌壓力好大,又啱啱轉成人賽,無論公路同場地單車都比得唔好,成個2013年都好低迷,唔知自己做緊咩,比賽又冇成績,覺得嘥咗1年。後來記起自己4年前曾講過,要衝擊仁川亞運一面獎牌,於是今年好畀心機。
阿寶喺對上兩屆亞運公路賽拎金牌,我賽前壓力好大,好彩搏盡去踩原來真係有回報,阿寶仲喺現場,雖然唔係金牌,但延續到港隊連續4屆有牌攞嘅威勢。
識睇,一定係睇足英台【英波Live】:
http://soccer.appledaily.com
http://bit.ly/engballlive