韋達係13屆香港冠軍騎師，騎功當然超卓，大部份時間亦表現穩定，否則冇可能長期有咁好成績。當然，有時佢嘅發揮亦會好令人激氣；今季最佳例子就係告達理隻「匯聚力量」，隻馬喺季前嘉年華試閘，以非常凌厲嘅後勁，輕鬆衝贏對手，睇得出隻馬今季嘅狀態嚟得好快，所以喺9月21日季內初出跑1400米，成為 2.7倍全熱門，不過當日韋達嘅發揮，就真係不敢恭維咯；自外檔出閘之後，一直大力扣住，唔畀座騎上前，結果沿途喺四五叠蝕位，消耗大量氣力，轉彎唔上唔落唔湯唔水，直路衝得幾步，好快就散晒。
好嘞，趁隻馬有勇態，告達理當然要珍惜，賽後攞定保護權，特登再報1400米，最重要係換上擅於捐窿捐罅，走位醒目嘅柏寶操刀，所以今次就算排9檔，相信亦唔會全程走外疊。柏寶今季成績反彈，季內佢同告達理合作四次，攞到一冠一亞一殿，雙方合作正處於蜜月期，「匯聚力量」飛起韋達，究竟上次係真輸定假敗，相信好快就有答案。