對不起，今天這篇不談足球。對不起，我沒有心情看球賽，亦沒時間。
對不起，受影響的市民，令交通造成不便，搭車又兜路，地鐵又逼人，希望你原諒學生（圖）。對不起，家長們，你哋抱怨個仔冇學返，但我哋幫緊佢哋同你個孫爭取緊啲嘢，你知道的，但如果你覺得民主自由冇用，也請不要為子女代答。
對不起，食店老闆，人流少七八成，租照交。我哋已經開始有救救商戶群組，請你將食店名字放上網，有人會拉隊幫襯，仲會介紹出去。對不起，報販，客流減少，請你貼告示出嚟，有朋友會即時同你掃幾十份報紙雜誌（文匯大公就例外），買多幾包煙幫你撐住，而你個肺可以清新一吓，因為冇車噴廢氣。
對不起，學生父母們，你個仔要瞓街，但𠵱家已經識自動執垃圾、揸掃帚（要學㗎）、關心問候人、主動幫助人，你等佢返嚟幫你洗碗啦。對不起，政總員工，我看得出你們服務市民責任心非常重，你們憤怒我們致歉。對不起，警察家人及朋友，佢哋冇時間陪你哋，但望到友善巡邏警，我哋會講︰「阿sir辛苦晒，冇得放假，麻煩錫住學生！」我見到佢哋有笑。對不起，肝（成日捱夜）胃（成日冇胃口）肺（吸催淚煙）。對不起，MK仔女，你哋原來心哋好，會支持學生。對不起，黑社會，市民已經唔怕你，搵定正行吧。
梁栢堅
填詞人+彩池人