今期沙田第九場賽事，苗禮德馬房隻「酣睡密碼」，由於係在港初出，馬迷肯定未幫襯過佢，但隻馬嘅馬主許章榮，大家就可能買過佢嘅產品。許章榮係寢具雅芳婷嘅老闆，不過論到知名度，雅芳婷嘅代言人佘詩曼，就更為公眾所熟悉。
講番「酣睡密碼」，隻馬來港前只一戰，喺多達17隻馬嘅1200米場合輕勝近兩身位，實力唔惹小，而「酣睡密碼」嘅同母家姐All Is Secret，喺南非就好似佘詩曼咁出名。點解呢？A11 Is Secret乃去年南非水星短途錦標盟主，呢項賽事係世界頂級短途名駒搖籃；好似03年冠軍「貨幣名駒」，同年跑香港短途錦標，只輸畀一代馬王「精英大師」；而08及10年水星錦標得主「卡通飛機」，更於2010香港短途錦標獲勝。
「酣睡密碼」同家姐All Is Secret一樣都係灰馬，實力有保證，來港只插入三班一定有着數，上個月佢試兩次大閘，一次第二，另一次就後上強勁勝出，睇得出已適應環境，狀態起得好快，唔知今次阿佘會唔會入場打氣呢？