身在內地、心在港的秋生，連日追看新聞並在fb發聲，看到警方縱容反佔中暴徒行為，秋生即揶揄保安局局長黎棟國：「棟國果然冇改錯名，棟X咗自己個國。」秋生不屑自稱內地來男遊客帶刀踩入旺角幫手清拆標語，昨在電話中說：「普通巿民帶刀出街已當攻擊性武器，點解警方唔拉呢個人，根本冇盡忠職守保護巿民，咁我攞把關刀出街，我有理由懷疑警員係同黨，佢已經違法。」
秋生強烈譴責反佔中人士的暴力行為，他續說：「已經唔係法治社會，警方有事都袖手旁觀，有冇可恥心，呢啲係走狗，香港點解會變成咁？」之後他又在fb激動爆粗：「乜原來清場可以順便非禮㗎？X你班反佔中藍衣XX皮，唔叫埋我？我洪興班兄弟冇咁仆街，衰到要去收幾差嘢打𡃁仔，仲要非禮，咪X話畀人知你班冚家X係古惑仔。」
對於宿敵阿澤轉貼其留言，秋生在電話中與阿澤同一口徑：「呢個係公論，係唔係朋友另一件事，大是大非前冇啲咁嘅私人嘢，呢啲先係香港精神面貌，核心價值。」秋生支持學聯停止與林鄭月娥等高官對話：「點可以同暴力對話？佢哋唔譴責，政府已話畀我哋聽佢有份。」
而黃秋生昨日亦以演藝校友會主席身份拍下短片上載YouTube為演藝學生打氣。
此外，前港姐冠軍李珊珊前日和昨日先後兩次在微博發言，其中一次她坦言懷念以前由黃應士帶領的無綫新聞部，擺明批評指現時的無綫新聞報道偏頗，不夠中立。
採訪：陳杰、盧妹