香港4x100接力隊排除萬難，喺初賽黎振浩跑跑吓拉傷嘅逆境下，以跑得最慢嘅時間垂頭進入決賽，然後要跑好艱難嘅外線第8條lane俾人睇住嚟追，結果最後一棒徐志豪絕地反追，連過4個對手之下銅牌到手！5位隊友話畀大家知咩叫反敗為勝，此時此刻嘅香港，最需要就係呢啲純天然無雜質嘅本土故事！
接力不嬲係運動比賽入面最吸引嘅項目，個人實力以外仲要講拍檔之間有無火花，美少女游泳接力隊有幾sweet？你睇隔籬歐鎧淳嘅分享就feel到，至於田徑嘅幾位大男仔就先苦後甜，亦令人動容得毛管戙！好多大朋友包括我，細細個都無乜機會玩接力，因為通常有番咁上下實力先會俾阿sir睇得上眼，入閘門檻好高，但反而做咗家長之後，年年阿仔阿女學校都會預埋家長跑埋一份，我當然有參加，落場嘅激烈程度唔係人咁品，我見過有老竇跑咗兩步就飛撲落地，有阿媽面容扭曲腳又抽筋，幾肯定佢哋做人仔女時都無咁搏過，為乜？為咗唔想令仔女失望囉，如果佢自己一個跑，就未必會咁落力嘞（甚至跑都費事）。
讀書時期從未參加過4x100，反而大專時代玩足4年喺馬路跑嘅越野跑團體賽，其實呢個學界比賽係有個人項目嘅，但由於我哋成間院校無個跑得快，所以就索性唔理個人成績（唔使咁無癮），只集中爭團體嘅好成績，而我哋目標亦好鮮明，就係尾2當贏。
好不容易跑足4年，當中我哋只係贏過1年，差唔多年年都包尾有乜得着呢又？最後一次跑完之後，當我喺中大canteen咬緊雞髀時就忍唔住問咗教練呢個問題。
「coach，我覺得踢波好似開心啲喎，又多人自動蒲頭！」「係，踢波係開心，因為友誼建基於歡樂；長跑係艱辛，但你哋嘅友誼係一齊捱苦之下建立，深厚得多！而逆境波會令你哋成長得更快！」呢幾日見到馬路上接力長跑嘅年青人主動又自律，我就知道香港嘅下一代，應該好識打逆境波！
KEYMAN
節目主持
電郵：mailto:[email protected]