好多人問我，29歲喺仁川攞到女子花劍個人同團體賽兩面亞運銅牌，係咪會退役，其實我未決定。𠵱家擺喺眼前，最想盡快完成最後一年嘅理大學士課程，然後搵工。你問我同男友（亞運柔道代表張志業）有冇諗過結婚，講真，係有嘅，但一定喺我畢業後。
2012年倫奧識咗張志業後，大家都喺運動場上互相支持，我有時比賽，佢都會到場打氣；最遺憾係今次仁川亞運，我打花劍比賽嗰兩日，佢都分別要訓練同比賽，嚟唔到。我同佢都係part-time運動員，大家都好想喺自己鍾意嘅運動上繼續努力。
有心讀大學唔怕遲
呢個階段，亞運算告一段落，呢刻學業最緊要，預計出年30歲畢業。我咁遲先讀大學，係因為中學後一直經濟困難，要先工作搵到錢，先可以讀大學，所以特別珍惜。我嘅物業管理系同班同學都比我細，但佢哋都好關心我打劍㗎。
由2002年加入港隊後，我攞到嘅成績都算滿意，但好唔捨得一班花劍隊隊友，佢哋仲後生，好多進步空間。所以能夠堅持落去嘅話，我都會繼續打劍，或者同班隊友一齊衝個2016奧運資格都唔錯吖。
識睇，一定係睇足英台【英波Live】：
http://soccer.appledaily.com
http://bit.ly/engballlive