噚日建制派同愛字頭大反撲，動員社團中人用暴力對付佔中人士；而28個建制派嘅議員，噚日一字排開，全部戴晒撐警嘅藍絲帶開記招，話要聲討佔中人士，不過佢哋冇喺金鐘、旺角、尖沙嘴、甚至銅鑼灣開記招，反而戴晒頭盔，走去冇雷公咁遠嘅觀塘開！
亡國興嗌到爆青筋
話說28個建制派嘅議員，去到觀塘工業區內某間酒店，開記招話要「理性對話，尋求出路」，負責牽頭嘅民建聯譚耀宗，就梗係唔認戴頭盔，遠離佔中區開記招。
譚耀宗話，本來佢哋就打算喺番立法會度開記招嘅，不過立法會𠵱家外邊周圍都係人，甚至乎有市民喺度瞓覺㖭，既然佢哋都返唔到立法會，咪拜託旅遊界議員姚思榮搵一個場，俾建制派一齊出嚟見傳媒囉！
不過八方覺得建制派揀觀塘呢個地方，真係好有戰略考慮，因為觀塘一向係左派地頭，真係唔使怕有佔中人士踩場，戴咁大頂頭盔，真係講句嘢都特別有氣勢。
好似工聯會亡國興連青筋都現晒，不斷大聲咆哮話佔領人士影響打工仔生計、好唔公道、好唔公義呀！真係八方都嚇到要行遠少少！
講開又講，前日政務司司長林鄭月娥同立法會八大板塊政黨開會，原來冇預工聯會同新民黨，亡國興噚日同八方確認唔知有呢場密會，佢亦好大方咁話唔介意。但冇份開會嘅新民黨，唔知係咪介意冇份，所以葉劉噚日自告奮勇，話願意出嚟參與各方會談，你睇建制派幾團結呢！
李八方
mailto:[email protected]