以身中催淚彈姿態，出現喺《時代》雜誌封面嘅壹傳媒主席黎智英，繼早前接受CNN嘅訪問之後，噚日八方見到佢喺金鐘接受BBC訪問，台灣壹電視亦跟住訪問佢，之後黎智英就俾無綫記者林昭儀捉住問。雖然記者勇字行頭，但CCTVB點會咁易畀黎智英「出閘」呢？佔中開始後無綫新聞多個片段，偶然見黎智英過吓鏡，但唔知出訪問得唔得呢？
不過訪問乃公開進行，所以周圍嘅人士都聽到記者問乜。林昭儀問黎智英，𠵱家整個佔領運動似乎冇人領導到，咁點算好？加上運動出現分歧點搞，又會否擔心佔中漸失支持？黎智英認為，最重要大家係目標一致，追求真普選，大家唔好放棄，又指唔擔心佔中支持會下降。