Xbox One同PS4推出之時，到底新世代主機大戰鹿死誰手？PS4上年已經推出，原本遲大到既Xbox One，個多星期前開售時，打算「挾FIFA以令機迷」，借新球季，推同捆《FIFA 15》Xbox One反擊，點知就預著「雨傘革命」，有Game舖老闆話，銷路點都受到影響。
不過，電器良品老闆阿文同我講，佔中咗幾日，人流開始少幅反彈，影響唔算大，買Game的人，都有一定數目，但Xbox One因為護航作唔夠多，對比PS4，直頭可以話無咩Game玩，所以主機銷情稍差，最差試過十比一，每賣十部PS4，只賣得出一部Xbox One，平均每日Xbox One賣得幾部，PS4卻有雙位數。阿文仲話，Xbox One同捆《FIFA 15》只得一張下載卡，玩家好難二手轉讓張卡出去，「要買都會買番實體遊戲啦。」因此亦影響主機銷量。
記者行過兩大Game場，Xbox陣容的遊戲，的確唔夠，而且獨佔大作亦唔多，睇嚟硬件絕對唔差的Xbox One，認真要諗諗計。
記者：童傑