【歡樂英超】近期金句「怯，就會輸一世」橫行，其實在足球世界裏，只懂進攻而不懂防守的話，同樣會輸一世，同樣難以稱王。以曼聯為例，前線巨星如雲，防線卻如豆腐一般，難怪雲膏蟹都要請教師傅包租婆。
擺大個頭就一定能夠贏出球賽？未必，因為分分鐘前面入埋唔夠後面輸。曼聯之前對升班馬李斯特城，前線雖然入3球，但最終反敗3:5收場，證明只顧進攻根本行不通。上場險勝韋斯咸亦驚險萬分，豆腐防線仍然相當牙煙。
包租婆用拖鞋打醒雲膏蟹：「練武最緊要一膽二力三功夫，教波就最緊要一攻二守三平衡，做到攻守平衡先可以令隊波成功。進攻係緊要，但金鐘罩防線更加緊要！」事實上，曼聯兩閘表現算是合格，只是中堅級數欠火候；包租婆亦呼籲雲膏蟹，千萬別將《功夫》變作《攻Fool》，只懂進攻愚者也。曼聯周日硬撼愛華頓，會否又前面入埋唔夠後面輸？
球壇最火辣消息與趣聞，盡在【足英台】：
http://soccer.appledaily.com