全民大廣場，無數小花大作戰！嚟自大埔孫方中書院嘅中五美少女何諾桐，日前喺政總外將水馬化身民主牆，畀市民寫出普選心聲，成為抗爭市民check-in之處。唔少市民見佢弱質纖纖、但攞住大聲公奮力叫咪都異常感動，大讚小花力量唔可以睇小！原來連日佔鐘市民嘅訴求，已經貼滿咗成30幾隻水馬，何諾桐今日變陣，攞咗啲黑紙鋪喺地下「擴充版圖」，以免市民有訴求而冇位訴，結果又係一朝早就爆晒。
清秀妹何諾桐噚日冇再着校服現身，換咗清爽熱褲look亮相，唔少中外記者見佢咁落力，都不停搵佢做訪問。清秀妹笑言，爸爸見到佢上報，知佢好努力，仲叫佢加油。原來佢已經去咗政總成七日、發起民主牆都三日，話唔攰就呃人，但佢話會撐落去！