本欄個名原意純粹抽吓水，本來不想多談政治，但眼見近日坊間對運動有好多迴響，今日都搭兩嘴啦。話說一班較保守嘅家長好反對佔中，認為學生最終會輸晒，但古道祥真係唔係咁睇喎。事實上，由發催淚彈嗰日計，商家佬冇一個真正發表過聲明，好明顯等緊中央真正的表態，所以班學生未必輸晒喎！既然一班最大既得利益者都未出聲，點解唔撐吓班初生之犢呢？
講完政治，講返股票，其實都可以一齊講，因為而家係政治市，政治市最難估。不過，正所謂時勢做英雄，只要股份基本因素佳，正好喺呢啲亂市中儲平貨，尤其啲大股，例如港交所（388），嘩！170蚊都穿埋，跌市好多人都唔敢撈，但呢啲人多數冇發達，你諗吓你係邊啲人。
不過買大股短期預咗捱價，如果純粹落鑊炒嘢，都有啲細股可以諗吓，好似隻中國汽車內飾（048），佢之前批0.38元嘅新股到咗，佢呢兩日都跌唔落，擺明接咗貨嗰啲焗砌，可偷跳。另外呢幾日做緊旗形嘅實力建業（519）都可以睇睇，佢早輪供完股，主席洪生手貨齊返晒，6億市值，之前又傾過賣，應該都唔使祥仔講佢會再炒乜啦！
古道祥
本欄逢周五刊出