逢周五，咖喱牛腩都會跟大家暢談球壇的人和事。既會嘻笑怒罵，寫出激情，亦會冷靜分析，寫出理性。
「走數」，係高登名詞之一，主要用於網民信誓旦旦嘅承諾無法兌現，當走數情況出現，其他網友就會以「認真便輸了」作安慰。大家仲記得樸茨茅夫嗎？呢支英格蘭南部球隊早幾年稱得上英超異軍，2008年贏英足盃，2010年就屈居亞軍，不過擴張過度引起嚴重債務，連番出售大牌球員還債，結果一季降一級，𠵱家喺英乙打滾。
不過樸茅充滿責任心，冇因為嚴重債務而走數，甚至宣佈破產，經過兩次接管，又靠球迷集資還債，加上現時13位董事籌集資金，已經成功清還全部債務，比原先估計早兩年。其中一個叫史超活羅賓遜嘅董事，仲願意出資50萬鎊修繕球場，希望主場可容納2萬人㖭。
雖然今時今日樸茅仲只係英乙中游球隊，不過只要會方目標明確，球迷又入番場支持，唔係冇可能英超再見。其實球隊過去都為球迷留下好印象，簡奴、蘇甘保鹹魚翻生，仲打起過格連莊臣、高治等球員，而且同修咸頓嘅南部打吡又稱得上英格蘭傳統打吡之一，小弟都好期望樸茨重返英超嘅一刻，不過當然至少要等多3季啦。
講開走數，「薑蓉」講佔中搞得成就會移民，但仲見佢喺電視機前指指點點，唔通「留名等走數」？文：牽牛