人氣爆燈的韓國男子天團BIGBANG隊長G-DRAGON（GD）11年曾被爆在日本吸毒，當時震驚整個亞洲，而GD亦立誓不會再掂毒品。怎料，GD前日竟於Instagram公開一張寫有「Molly」（俗稱「迷魂藥」）字眼的白粉相，即時再捲入吸毒疑雲，更惹來網民討論及譴責。事後GD以九秒九删除照片，令人懷疑他知衰扮無事。
出事即刪相
前日，GD於Instagram公開一張用白色粉末砌成心心圖案、中間寫住「Molly」字眼的相片，有網民質疑相片中的Molly是指俗稱「迷魂藥」的一種興奮劑亞甲二氧甲基苯丙胺（MDMA），吸食後會令人產生幻覺、近日在美國年青人間非常流行的新型毒品。相片公開後，有網友猜疑GD再次吸毒，而GD亦似乎得知出事後亦快速刪除照片，即時引來網友譴責聲仍不斷。有粉絲維護偶像指GD可能不知道Molly是毒品，只是貪得意上載照片，但有網友就反駁表示GD曾經於Instagram留言「popped a molly I'm sweatin, WHOO（吸一口molly，我在冒汗。）」，認為GD早已知道Molly是毒品。
玩過龍闖禍
有網友亦質疑該毒品相是GD在上月30日在巴黎出席Chanel的時裝騷時所拍的，當日GD緋聞女友日本女星水原希子亦在場，可能GD有美人相伴，又身處外國太樂極忘形，手快快上載毒品相而闖禍。GD今次涉及毒品，令人再次翻揭他於11年5月在日本開騷期間，曾因蒲夜店吸食大麻而被捕的新聞。當時GD承認吸毒，但供稱是無心之失，GD所屬公司YG事務所亦發道歉聲明為其補鑊。當年檢察廳考慮到GD是大學生以及初犯而決定暫不作出起訴，今次GD再次涉嫌吸毒，網民懷疑他不知悔改，令不少粉絲非常失望。
撰文：梁雯迪