官逼民反！香港佔中行動持續多日，參加者表現冷靜平和令世人眼前一亮。不幸的是，上「梁」不正下樑「歪」，警方竟然煞有介事施放催淚彈對付手無寸鐵嘅示威人士，傷盡港人心，令內部矛盾加劇。當權者一貫若無其事滿口歪理賴死唔走，阿爺短期亦唔會換人，對大部份仲有良知嘅港人而言，唔知幾時先見到黎明。
港股今日長假期後復市，零售、地產及服務業股首當其衝，加上美股走勢變壞，市場氣氛差，細價殼股恐怕繼續人踩人。
外圍方面，上個禮拜提過唔知有冇關，阿里巴巴前周上市後，美股走勢的確波動咗，上周VIX飆23%後，道指周三失驚無神又跌兩舊幾，細價股指數羅素2000相比3月高位已回吐10%，技術上進入調整市。有趣的是，憂慮香港佔中事件影響中國政經，竟然外國傳媒推舉為道指周二波動嘅原因。「新末日博士」、紐約大學經濟學教授魯賓尼（Nouriel Roubini）近日亦撰文，列舉香港佔中示威集會為引爆金融危機的潛在藥引之一。
第三季剛過去，概括而言就係美元獨大，商品趴街。美滙指數上季上升7.7%，係六年來表現最佳，指數截至上周止連升11個禮拜，前所未見。美元走勢咁堅，除咗炒作聯儲局明年加息，歐洲央行行長終於向現實低頭，上季減息兼放水，終止歐元過去年多嘅強勢局面，唔揸美元根據冇嘢揀。
央行干預 紐元雪上加霜
各主要貨幣當中，紐元上季累跌逾10%，表現排包尾，令好多人跌眼鏡。事關新西蘭央行係全球首個恢復加息的主要國家，今年3月開始後總共加咗四次，息口由2.5厘加到3.5厘，紐元滙價亦受惠加息水漲船高，7月時曾升到86美仙創六年新高。
原本市場預期新西蘭年尾最少再加一至兩次息，點知當地奶類產品價格跌得好急，對經濟帶來壓力，促使央行暫停加息，加上官方多次預警不排除干預滙市，令紐元掉頭向下。最令大家意外嘅係央行本周披露上月曾經入市拋售紐元，而且規模係三年最多，拖累紐元周二曾跌至77美仙邊，創一年新低。
美元強勢，以其作為計價單位嘅商品亦跌到一仆一碌。金價去年下跌28%後，雖然年初大有起色，年中曾升逾10%，但隨着儲局加息明朗，通脹溫和，金價作為對沖通脹的價值越來越細，拖累上季累跌近9%。
金融海嘯後，儲局QE成為金價大升催化劑，高升到1,900美元，隨著儲局政策開始還原，無論以2008年嗰陣嘅1,000美元及十年前的400多美元作為參考，金價下跌空間仍然好大，喺美息上升趨勢下，沽金不失為今季以及中線值博的大茶飯。
奇兵
本欄逢周五刊登