佔中開始後，形勢一直在變，有人支持，有人反對，有人因意見不同開始喺facebook「unfriend」朋友；鬧開嘅繼續鬧，選擇沉默嘅繼續沉默。中環人似乎仲未受到嚴重影響，幾大證券行一切如常，有中資公司要求員工唔好參與佔中亦係意料中事，但係無論如何，大家最希望成件事可以盡快和平收科。
【高盛】提醒員工預早出門
美資大行高盛租用「超人」李嘉誠嘅中環長江中心，據高盛賓架所講，長江中心嘅保安情況，跟舊年有碼頭外判工人喺門外示威時差唔多，保安人員係多咗；加上電梯大堂舊年底加裝咗入閘機，所有喺長江中心返工嘅員工，入閘時都要向保安出示職員證。
高盛內部就冇白紙黑字嘅佔中指引，只係提醒員工，如果擔心佔中活動影響返工時間，就提早出門，或者選擇喺屋企工作。不過佢話，中環市面嘅情況其實相當平靜，「睇電視新聞都知冇可能返唔到工，大家其實冇藉口唔返工。」
【摩通】午夜電郵通知安排
喺中環遮打大廈返工嘅摩根大通賓架透露，由星期日佔中啟動開始，公司每晚12點都會向員工發出訊息或電郵，因應當天示威情況評估翌日狀況，至今每晚都係收到「一切如常，明天準時返工」嘅通知。
唯一唔同，係過去兩日國慶假期，公司呼籲同事冇乜事就唔好返公司，如果要返公司開會或工作，就要事先通知保安部門。公司亦要求佢哋帶手提電腦返歸，萬一翌日返唔到公司都可以如常在家工作。
佢指，好多家住中半山嘅賓架同事往日會坐幾分鐘車返工，𠵱家就預早大約半小時出門口，改為行路返公司，又由於中環多天橋接駁各幢主要寫字樓，所以佔中未有帶來任何不便。
【中銀國際】高層7am開會評估
具有中資背景嘅中銀國際，除咗中環總行，喺上環新紀元廣場亦設有寫字樓。據了解，自佔中運動開始，由中銀國際各部門阿頭組成嘅「應變小組」每朝晨早7點就要開會，主要係評估一下當日市面情況，然後以手機訊息通知所有員工，至今都係話冇乜特別情況，叫大家準時返工之類。
雖然係中資背景，但據講，員工暫時冇收到任何明示或暗示，叫佢哋唔好參與佔中。有員工估計，可能因為中銀國際比較多高層係香港人，所以冇其他中資公司咁有中資特色。
【太平保險】白紙黑字籲勿佔中
中資公司叫員工勿參與佔中活動應該係意料中事，只係估唔到有公司會白紙黑字出通告箒。有中國太平保險員工爆料，指公司嘅香港總經理室日前發出通告，指政府已經宣佈佔中係非法活動，叫全體員工「安心做好本職工作」，唔好參與佔中，仲要「對這一違法活動不圍觀，不傳謠，不信謠」，換言之，就連行過睇吓都唔好咁話。
最離譜係，呢間公司竟然建議公司全部員工「勸告」自己嘅家屬亦都唔好參與佔中活動；喂，打工咋喎，唔係連家屬嘅示威自由都要被人管啩？
藺常念怨收入減少
佔中啟動多日，財金界都冇乜人發聲，一向敢言又話支持香港有民主嘅股壇「開心果」藺常念（藺Sir）噚日忽然現身金鐘政府總部對出嘅夏愨道，不過佢並唔係參加佔中活動，亦唔係撐學生，竟然係借佔中呢個場景，抱怨佔中活動令佢收入減少，被迫罷課！
藺Sir噚日係第一次到佔中現場，而且只係為接受BBC記者（圖右）訪問，唔係要參加佔中。佢大呻，佔中拖累股市下跌，搞到佢呢啲靠幫人管理投資為生嘅人，收入減少。而且，佢原本喺銅鑼灣上堂教散戶投資，受佔中影響，近幾日嘅課堂被迫取消，對佢生計有好大影響咁話。
藺Sir強調，佢仍然好支持民主運動，但唔接受佔中呢個方法，認為應該接受行政會議召集人林煥光嘅提議，叫大家去佔領添馬公園，仲話證券業界有95%嘅人都係咁諗喎。唔知有幾多中環人buy佢呢個講法呢？
蔡東豪潛水 明日現身？
網媒《主場新聞》創辦人蔡東豪以往積極參與政治運動，但自從佢今年7月底突然喺網站發表一封公開信宣佈結束《主場新聞》後，就幾乎銷聲匿迹，近日嘅佔中活動，當然亦見唔到佢蹤影，多名戰友都好難聯絡到佢。
據聞，一向熱愛跑步嘅蔡東豪一直有練跑，亦有報名參與本周六舉行嘅「康宏圖騰跑」，康宏圖騰跑設有57公里與16公里兩個賽程，分別由西貢北潭涌與城門水塘主壩起步，以大帽山扶輪公園做終點，但係𠵱家咁敏感，唔知蔡東豪會否選擇繼續潛水嘞。
李華華
mailto:[email protected]
