【花園道】正當全世界都關注香港人勇敢上街爭取普選，周潤發同劉德華發聲指摘政府用咗過份武力，頻頻返內地賺人仔嘅B哥哥鍾鎮濤就有唔同嘅睇法，前幾日同老婆范姜齊齊喺網上轉貼文章反對佔中，雖然佢好快將貼文刪除，但已經引起網民熱烈討論，有人贊成佢哋講嘅嘢，當然亦有人反對鬧爆佢，不過，B哥哥嘅心情就一啲都冇到受影響，前晚仲約埋一班好友喺中環私竇開party。
坐之之男友車
前晚大約10點幾，B哥哥坐關之琳男友陳泰銘嘅車，同關之琳、陳泰銘一齊去到花園道科達中心樓下落車，之之發現有記者影相即通知B哥哥，之後就一齊上咗23樓私竇Garden 51，而范姜喺B哥哥到咗冇耐之後，就同B哥哥大女嘉晴、嘉晴男朋友同化妝師等幾個朋友一齊到埗，而曾志偉、梁家輝同老婆、葉童同老公陳國熹都陸續出現，嗰晚至少有10幾人參加呢個party。
採訪、攝影：陳辰、徐錦池、畢紹基