時間可以證明一切！
當日韋碧克（圖）嚟到阿仙奴嘅時候，好多球迷都認為佢實力一般，仲要因為佢踢過曼聯，所以認為佢嚟阿仙奴只係一場笑話。但係經過5場之後，佢話咁快已經為阿仙奴入咗4球、交出1個助攻，表現絕對出色。當然，你或者會話時間先可以證明一切，而家評價未免太早！
𠵱家世界速度咁快，慢少少都唔得。就好似韋碧克，好多球迷當初甚至未睇佢落場，就已經話佢只會係雲格嘅權宜之計，唔係plan A。諗諗吓，其實日常生活亦係一樣，好多時候根本未開始，就已經下定論話唔得；甚至會因為唔同身份、背景、相貌、一兩次對話就去判定一個人嘅能力同價值，其實唔係應該要畀多少時間佢哋去證明自己咩？每個球員都需要時間，就算再有天份，都需要足夠落場機會、教導先可以成材。我只係一個普通球迷，亦相信球會要成功，真係不急於一時，就算8年、9年又如何？只要係真心球迷，就應該相信同支持球隊，畀多啲空間同時間。
阿仙奴今周對車路士，阿仙奴嘅球員開始上力，周中歐聯贏加拉塔沙雷，奧斯爾同韋碧克終於有番表現，「韋帝」仲戴埋「帽」！而且哥林張伯斯、哥斯尼等後防都開始有默契。雖然車路士開季已全速前進，但始終好難保持長勝，我相信槍手今場一定可以打敗車仔，送今季第一場輸波畀對手！
LULU
不懂踢波愛睇波