巨型怪獸哥斯拉搶灘，為自己發聲怒吼，軍隊鎮壓催淚彈飛彈乜彈都射齊，以地球為家嘅哥斯拉邊走邊避，附近居民落荒而逃，咒罵巨獸擾亂生活。到最後，大家先發現呢隻巨獸搞到幾乎命都冇，就係為咗消滅另外兩隻危害地球嘅巨獸MUTO，讓人類重獲自由同安寧。情節熟口熟面？就只差一條黃絲帶。
電影公司喺開拍時，已不斷強調今次係重拍而非續集，皆因1998年美國拍嗰套同名電影，雖然同日本東寶攞正版權拍電影，不過拍出嚟完全兩回事，哥斯拉變咗鬼鬼祟祟嘅巨型蜥蜴，最後仲俾英勇嘅美國軍隊收拾而大快人心，似拍巨獸版《侏羅紀》多啲，激到班㗎仔紮紮跳。為免fans誤會，今次reboot重拍標明跟足原著，包括哥斯拉造型、世界設定及反核主題等，只係加入荷李活強大CG特技，同埋鬼佬演員而已。
除咗《變種特攻》，龍叔叔今年最期待嘅科幻電影，就係呢套《哥斯拉》。老早預訂IMAX巨幕版3D戲飛，齋戒沐浴三日先入場，觀後感同好多人一樣，略嫌哥斯拉出場太遲太少，吊晒癮，希望續集有番多啲戲份就好。
每個特技片戲迷，每次買碟，就係想將戲院嗰份震撼帶返屋企重溫。雖然家中影音設備難敵IMAX戲院，不過就算只能重現50%，其實已令龍叔叔相當滿意。因為憑藉現今電腦科技，CG特技有幾逼真已經唔使多講，觀眾都開始感覺麻木，今次《哥斯拉》嘅表現，既有睇災難片嘅氣氛，仲有巨獸襲擊同隻揪，拍攝角度九成係用人嘅視線去睇，經常要仰望成幢樓咁高嘅巨獸，的確畀到新鮮感。
重低音連環轟
3D表現屬中上水準，巨獸站立喺大地之上、壞蛋MUTO四出破壞，以及市民逃跑嘅場面，都表達到3D嘅豐富層次感，唔似某啲港產片咁，最3D就係字幕。BD聲效以DTS-HD MA 7.1收錄，雖然只得48kHz，唔似港產片至興嘅24bit/96kHz，不過呢套戲嘅重點必然係重低音表現，前半段戲有大量直升機及巨獸MUTO嘅電磁脈衝攻擊等，都感覺到比其他影碟更沉厚嘅低音；到中段哥斯拉出場，同以一敵二高潮戲時，重低音連番衝擊，轟到心口有啲翳悶，學新馬仔話齋：震到入心吖！絕對能考驗家中Subwoofer同鄰居嘅承受能力。
港版BD分2D、3D同3D鐵盒三個版本，2D版唔使二百蚊實在非常抵買，不過龍叔叔愛死3D效果，對鐵盒收藏又冇乜心癮，最後揀了普通3D版，旺角價約$240算合理。唯一要投訴嘅，又係荷李活BD慣病，就係無bonus同making of，可能要等甚麼導演加長版之類先有得睇。
龍叔叔
簡介：幾十歲老宅男，聽歌煲碟打機無一不癡，一生最大成就便是家中收藏幾千隻碟，假日只愛潛伏家中煲碟，親情跟愛情也拋諸碟後。
