保華集團（498）喺場內嘅港口股當中，PB已經係平霸，而集團又食正阿爺鼓勵活化港口土地嘅國策，手頭有高達12平方公里嘅土儲，喺嚟緊嘅日子，會係肥仔水。
保華家陣揸住南通港口（45%）、宜昌港務（51%）、江陰蘇南集裝箱碼頭（40%），同嘉興內河國際碼頭（90%）。喺主要長江流域範圍及區域，打造了本身港口網，兼由集裝箱、商品、內河同倉儲等等瓣數，都齊備晒，比起其他國企級港口股，保華一樣有得fight。
PB平絕同行值博
但保華喺呢半年以嚟，股價冇乜郁過，場內大連港（2880）同期已經翻咗半番，廈門港（3378）升咗70%，就算慢打鑼嘅天津港（3382）都升咗17%，保華勁落後。
又保華現價（0.167元）PB得0.15倍，上邊大連港0.67倍，廈門港0.8倍，祖國行家重慶港九、唐山港、寧波港，全部係1倍樓上，保華係大折讓咗90%！
又保華家陣揸咗江蘇省南通市小洋口11.5平方公里土儲，正係計劃開發做區域性旅遊地點。呢幅土儲，等於60個維園般大，唔係嘢少。
仲要咁睇，阿爺今年開始，鼓勵國企港口企業，活化港口土儲，包括開發房地產、休閒景點業務。雖則，保華唔係國企，但集團呢壇製作，係食住國策，所以，喺日後開通，無往而不利，而喺嚟緊日子，保華嚟自房產本身，又或者集團再分拆地產瓣數出嚟，釋放出嚟嘅增值，都係超級肥仔水。
咪扯咁遠，冷灶煲保華，買落後，兼買勁抵搞PB，當保華翻半番到0.25元計，PB先得0.23倍，未有耐最低水位嘅大連港，又比起行家平均1.6倍PB，保華仲係大折讓85%。
錢雋
細價股專家
本欄逢周二、三、五刊出