佔領行動遍地開花，大家一直堅持非暴力，不過噚日又有人嚟挑釁，今次係狼英嘅愛女、是非多多嘅梁齊昕。自從罷課開始，梁齊昕連日嚟已經不斷撩交嗌，先係挑杜汶澤機，寸佢事業低潮博上位；之後又同網民罵戰，一時笑人英文差，一時話人hack佢個account。
噚日佢又嚟料，喺facebook度貼幅黑超自拍相，話「矇（蒙）面隱閉（蔽）離開禮賓府—踏出中環、有嘢做，認得我有種過黎（嚟）打我呀笨」。雖然幅相好快就刪咗，但網民一早cap咗圖，有人呼籲唔好睬佢，有人就鬧爆佢同老竇一擔擔。不過睇清楚幅相，齊昕着住黑色褸入面配黃色衫，唔通係隱晦呼應佔中嘅黑衫黃絲帶？