曼聯同阿仙奴真係宿敵，𠵱家叮噹馬頭，鬥到難分難解！我求大俠講緊嘅係傷兵數字。曼聯最新有安達靴里拉肋骨骨裂，至少唞3個星期；紅魔已經超越阿仙奴，成為英超傷兵榜首！
上輪對韋斯咸，曼聯驚濤駭浪咁贏2:1，搞到班魔迷好似坐過山車咁，心血少啲都頂唔順。曼聯喺呢場波仲要損兵折將，除咗朗尼從後踢人被逐出場、嚟緊要停賽3場之外，西班牙中場安達靴里拉摸住個背脊傷出。睇直播嗰陣見佢都可以自己行出場，諗住佢冇咩事；點知曼聯周二證實，靴里拉肋骨骨裂，傳媒估計佢至少唞3個星期，有啲就話6周，總之下星期日對愛華頓就一定缺陣啦。後尾有傳媒翻查比賽片段，懷疑靴里拉係撞到球證所以整傷肋骨，真係無妄之災！
𠵱家曼聯傷兵有一大籮，成9個人受傷，加埋朗尼停賽，領隊雲高爾又要為排陣煩惱，相信佢會派桑馬達頂替朗尼踢進攻中場，至於路爾斯華倫西亞就有機會頂靴里拉踢中場，而費查亦可以候命。好在防線有泰萊布力基坐完波監，佢應該會踢番正選，拍住馬高斯盧祖打中堅。其實雲高爾都幾黑仔，上任以來，傷兵數字都真係冇點跌過，班主力輪住嚟傷。
同阿仙奴有得揮
靴里拉嚟咗曼聯3個月，已經傷咗兩次，季初足踝受傷，復出番冇耐就到助骨。基斯史摩寧、菲爾鍾斯同埋莊尼伊雲斯更可以稱得上做後防3大玻璃人，相信佢哋喺醫療室聚會嘅時間仲多過喺場上，試問曼聯條防線點可能穩定！費蘭尼同卡域克已經復操，但未有聲氣話佢兩個可以復出對愛華頓。好彩，對埋「拖肥糖」後，就係國際賽期，曼聯有兩個星期回吓氣，等班傷兵出番嚟。睇見曼聯個傷兵名單，我求大俠真係覺得呢隊唔係曼徹斯特聯隊，而係玻璃人聯隊囉，紅魔中晒魔咒，睇嚟雲高爾可以做嘅就係祈禱。
喺英超傷兵榜上，唯一可以同曼聯「爭雄」嘅就係傷兵聯賽嘅傳統勁旅阿仙奴，好似迪保治、艾朗藍斯、阿迪達等加埋有8人受傷。其實我求大俠都諗唔明，點解年年阿仙奴都有咁多人受傷。
識睇，一定係睇足英台【英波Live】：
http://soccer.appledaily.com
http://bit.ly/engballlive