霍利時呢日都算代表作，早上才從澳洲趕返港，第三場爆完「爪皇豪火」，心中團火燒到第四場五班1400米，並且順利贏大熱門「正藍旗」起孖，一手包辦第三口孖寶，仲幫埋後駒開齋。
「正藍旗」開鑼日唔夠班底較高之「雙龍出海」衝，屈居亞軍，呢日匆出，班次、路程、磅位到配搭一概冇變，全靠韋達挑通眼眉，明知座騎走外檔望空至會跑得好，於是自一檔起步後逐段移出，入彎前抄出三、四叠，以防直路內欄塞車追唔切。結果畀佢求仁得仁，從大外欄越衝越勁，臨門及時超越「大眾良駒」影相險勝，幫馬主百億富豪顧明均今季首次拉頭馬，他邀請一班好友如「包裝」系馬主李文斌、「好友星威」馬主丁志威等一起拉頭馬，場面熱鬧。
顧明均說：「賽前我對『正藍旗』有一定信心，始終此馬在五班有利，能順利贏馬我很開心。」霍利時則表示「正藍旗」上仗季內初出已跑得接近，賽後狀態更弗，今仗韋達發揮出色，補中合理，升上四班負輕磅仍有利。
亞軍「大眾良駒」閘前落飛，沿途放鳶主宰步速，最後影相輸都冇話可說，同場跑第三係「自我本色」。