衣飾除咗要嚟扮靚，其實都可以反映心情！喺警隊出動防暴隊、用上催淚彈鎮壓和平示威市民後，唔少市民都好傷心，連日用黑、白衣哀悼香港淪陷日！但八方勢都估唔到，噚日特區政府搞嘅10.1活動，一片唔同深淺度嘅擦鞋愛國紅之中，政務司司長林鄭月娥竟然以黑、白衣現身，喺成班紅呔紅袍狼班子中零舍矚目，莫非係以示同專橫狼英仲有啲唔同？
狼太翻着紅旗袍
政界流傳狼班子對警方出動催淚彈都意見分歧，狼英當然硬撐，而林鄭等AO出身嘅官員就於心不忍。最終冇人知道傳言係真係假，但喺噚日對中央同特區嚟講都屬喜慶嘅活動上，林鄭卻以黑、白衣亮相，難免令人覺得以衫表心迹。
事實上，無論係狼英、前特首董伯伯以及中聯辦主任張曉明，都不約而同打咗凸顯愛國、擦鞋、聽話嘅紅色呔為阿爺賀壽；就連狼太亦翻着以前出過場嘅棗紅旗袍，寓意「棗國紅」。咁樣對比下，林鄭着住佔領者呢期最常着，代表傷痛同抗爭嘅黑、白色出場，又真係令人有無限聯想！而噚日嘅酒會，前特首煲呔同前政務司司長唐唐都冇亮相，唔通係為免見到力撐暴力嘅狼班子而神傷？而對於唔少十．一海難家屬嚟講，呢日係港殤，所以專責嘅運輸及房屋局局長張炳良亦棄紅，以低調綠呔現身。
李八方
mailto:[email protected]