上星期日到金鐘太古廣場參加投資講座，去之前有諗過應該坐地鐵去吖，還是揸車去？當時已知政府總部外有靜坐抗議行動，人數唔算多，過往即使有幾千人包圍政總，金鐘道還是通行無阻嘅啫，於是諗完一輪，還是貪快，揸車直奔太古廣場，沿途順風順水，好快就到。
四點半鬆人嘞，走出太古廣場平台望吓金鐘馬路，見到行車雖慢，唔算擠塞，於是大安旨意坐地鐵去鰂魚涌香港殯儀館向銀行界前輩呂培英先生靈前鞠躬，預算之後就返回太古廣場攞車過西隧回家。點解唔揸車落鰂魚涌呢？係因為唔知停在那裏，如泊在太古坊停車場，行番轉頭去殯儀館都行到周身大汗啦，坐地鐵自鰂魚涌站模範里出口去殯儀館，幾分鐘之嗎。到了靈堂，向呂前輩行三鞠躬禮，與呂公子孟雄及呂太馮美儀握手致意，呂公子係左丁山當年銀行同事，馮女士係中環法律界無人不識嘅著名律師，馮父就係當年華僑日報、華僑晚報極著名財經編輯/專欄作家李文（筆名）嘅二千金，佢家姐就是梁智鴻醫生嘅夫人馮令儀醫生。
行禮如儀之後，有人輕聲一嗌，哦，熟人也，於是坐在兩位陳先生之旁，其中一位就係公眾人物行政會議成員陳智思。坐到六點，手機傳來訊息話警察在金鐘放催淚彈，暗叫一聲弊傢伙，連忙通知陳智思，佢亦一皺眉頭，即刻與左丁山、陳先生、陳太趨前，行三鞠躬禮，退席離去。左丁山快步走去模範里落地鐵，但係班車未去到天后，已收到不少短訊話金鐘道可能封路，附近交通擠塞到極。唯有當機立斷，轉搭調景嶺線到油塘站搵的士返屋企，架車就留在太古廣場過夜。呢次貴咯，次日中午先至有時間去到停車場攞車回家，停車費係650元，係自己從未俾過嘅高昂停車費，唔肉痛就假，因西行往西隧不得，改跟隨前面所有汽車打橫轉入皇后大道東，在汽車難以移動或停留不動之際，睇到不少WhatsApp駡葉劉淑儀，原來佢在電台講學生示威唔係省油的燈，示威者有組織有資源，警方放催淚彈係需要嘅！哎吔，呢個葉劉真厲害，攻心計好掂，會係CY競選連任之心腹大患，明日再講。