本屆國慶盃於市面多區被佔領之緊張氣氛下進行，結果跑落畀落飛黨佔領整個彩池，今場1000米三級賽，兩匹落重飛之啡燈馬「喜寶駒」及「積多福」分別跑一、三名，「幸福指數」得第二，開出14倍啡燈Q；「喜寶駒」重注得手，於何澤堯胯下勇奪國慶盃，賀賢連同第六場頭馬「津津樂道」，起孖捧盃做主角。
國慶盃係今季首項分級賽，由「崇山寶」做台柱成大熱，馬主洪金寶率領一家入場打氣，聲氣浩大，可惜大哥大卻敗興而回。呢匹杜拜阿喬斯短途錦標盟主由頭熱到尾，不過於老拍檔雷神胯下卻虎頭蛇尾，放到最後一百米力弱墮退，中段雷神曾一度望其後腳，敗象早呈，最終跑梗頸四，單是獨贏、位置彩池，已輸掉1,261萬，馬迷一殼眼淚！
反觀上仗由雷神建功之「喜寶駒」跑來有前有後，並由何澤堯大勝而回；賀賢今場雙龍出海，賽前普遍認定未敗之師「兵威振」為主力，不過後駒因韋達造唔到磅而換楊明綸，跑落周身白汗遠遜於廐侶「喜寶駒」，最終更包尾幾乎拉停。
呢日大利1檔馬，頭六場1檔馬豪奪三冠一亞，連帶呢場直路賽排不利1檔之「積多福」都有好表現，僅影相不敵「幸福指數」得第三，三重彩派彩比預期中少得多，連3,000元都唔夠，落飛黨肚滿腸肥！