【遮打革命 Umbrella Revolution】昨日10.1，遮打革命進入高潮，街上擠滿和平佔領的馬路天使，樂隊RubberBand成員泥鯭、石天欣、王宗堯、麥子樂、前主播張寶華等勇敢上街爭普選；在這民主抗爭的嚴峻時刻，天后鄭秀文、楊千嬅、謝安琪相繼發聲撐學生，兩位民間特首更挺身齊聲譴責，周潤發轟政府使用武力做錯，劉德華更高呼不要催淚彈。
遮打革命進入第三天，適逢昨日是10.1假期，逾10萬市民湧上街不是慶祝國慶，而是參與遍地開花的和平佔領，兩位民間特首都不再認命噤聲，周潤發在電話譴責政府：「市民學生爭取訴求好勇敢，令人感動，警方第一日已經係錯咗，使唔使用到掟催淚彈呀？學生全部都好理智，如果政府唔係有一個新方案，令到香港市民學生滿意，呢個抗爭我諗唔會停。學生叫梁振英落台，其實你叫邊個落台都無補於事，𠵱家最主要係解決咗個方案先。」
發哥叫特首唔好避
面對梁振英連日來力撐警方專業，又拒絕與學生直接對話，發哥說：「如果政府再用暴力對付學生，你令香港市民好反感。佢哋個訴求好清楚，點解你成日叫人袋住先，你唔可以接納一個方案，係政府你袋住先？咁有錢，你後面有中國backup你，我都唔知你怕乜？學生或市民如果達唔到要求，大家只會繼續拉布，應該討論一個方案，係雙方可接受，咁先係解決方法。我唔想見到有邊方面受傷，學生係好理智好聰明和平抗爭，你毋須用咁暴力嘅催淚彈，你一定要解決咗佢先，你唔可以避，梁振英唔可以避。」
另一位民間特首劉德華就在華仔天地官網撰文「香港平安」，呼籲警方不要用武力：「香港人，都愛香港。爭取訴求，要關心自己、顧及大眾。大家都不要被少數挑釁者影響情緒。不要催淚瓦斯，不要武力，不要謾罵。學生們、示威者們，要擔心自己的安全，要知道有家人在擔心你們的安全。願香港平安。」
Sammi千嬅支持學生
天后鄭秀文（Sammi）昨凌晨在微博貼着黑衣相，留言：「香港所經歷的，實在令每個人內心充滿悲痛，最重要的是學生們和市民平安無恙。香港加油！」楊千嬅則在社交網留言：「路要走下去，希望政府早日解決問題，聆聽聲音，不要武力，孩子們，群眾們平安。」
至於身在巴黎心在香港的何韻詩，昨出席LV時裝騷說：「唔係唔在乎內地支持者，但呢個時候個心叫你做，唔可以唔理。」對於很少藝人為普選發聲，阿詩體諒說：「相信好多藝人背後有成隊team要照顧要養，明白有啲人唔可以行得咁前，我、明哥（黃耀明）比較冇顧慮可以行前啲，呢啲位冇得諗，餓唔死。」前晚到金鐘派物資的謝安琪則說：「喺香港生活咗幾十年，我從來未見過執法人員將槍口指向無辜市民，好大衝擊！」
藝人也紛紛上街爭普選，去年被迫演出維穩騷「香港巨蛋音樂節」，揚言身在曹營心在漢的RubberBand成員泥鯭，連日都有現身撐學運，昨10.1就佔領銅鑼灣，他大讚學生熱血：「爭取真普選，撤回人大方案，仲有最重要係梁特首知道要退，知道要落台。」
石天欣、前有線主播張寶華分別跟媽咪到金鐘聲援，石天欣說：「因為我愛香港，唔想喺未來後悔自己無參與今次行動。」張寶華則說：「政府太傲慢，槍口點可能對住自己人民！」而麥子樂和王宗堯相約到銅鑼灣撐學生，麥子樂憶述當日中催淚彈情況：「距離2米有催淚彈，喉嚨好痛，全身好似搽辣椒膏咁。」王宗堯則讚學生有大將之風，香港人好團結。
採訪：溫敏芝、卓寶花、鍾國仁、梁錦雯
攝影：陳慧安、陳志嵐