今日中環本來會有人擺下民主盛宴，不少朋友會帶備蒸餾水去飲一兩日。陳健民教授在電台講運動，主旨在和平，大有仿效印度甘地搞不合作運動之意，純以和平手法爭取真普選，一於罵不還口、打不還手，讓打人者、施暴者暴露其醜惡面貌於陽光下。如此如斯靜坐抗議，倘能貫徹到底，必能贏得世人同情，抱明知不可為而為之的精神，求頑石點頭，值得支持。
怎知道，事情發展得太快，9月28日晚上，警察已向示威群眾放催淚彈、催淚煙，刺激起全港情緒，熱血年青人紛紛從四方八面湧往金鐘、銅鑼灣、旺角靜坐，政府難以善其後。於是乎，今晚煙花取消，梁振英上台伊始，2012年十月一日有沉船，2014年十月一日有罷課佔中，仲唔算係壞腳頭？
那邊廂，國家主席下令三個堅定不移，絕不讓步，梁振英那敢怠慢，只可沿着硬碰硬的方向，與立法會的泛民議員火併，兼且在西環全力輔助下，一於摻散沙子，撬牆腳，軟硬兼施。希望搶得4名泛民議員臨門轉軚，投政府一票，助建制派取得立法會內之三分二多數票，令人大常委決定可在立法會通過的話。
七十幾人上京見過主席之後，消息傳出，三個堅定不移必須執行，無退讓餘地，中央認為香港直選，並非現等國家大事，國家正忙於：（一）處理中美關係，如何聯俄抗美，與美國既有經濟合作，亦有意識形態對抗；（二）處理邊境周邊事務，東有日本，南有菲越，西有印度，遠啲有巴基斯坦境內穆斯林恐怖分子支持疆獨；（三）反貪腐涉及權力鬥爭，關乎某些人的存亡；（四）防止GDP增長放緩，經濟下滑，釀成就業問題導致社會不穩。
既然如此，中央領導人擺出強硬姿態，三個堅定不移，叫梁振英你搞掂佢，唔好煩親我地！梁先生掛帥搞唔掂，人大常委決定不能在立法會通過，咁又點？咪原地踏步囉，中央覺得沒有甚麼大不了，反正梁振英上任不過兩年，已成跛腳鴨。在此時刻，傳出習近平嘅「主流分流」論，誰是主流，誰是分流，唔駛多解釋，黃河是主流，渭水是分流，當然中央就是主流，就是黃河、長江，河水可以不犯井水，但黃河、長江絕對可以左右分流嘅水流！目前香港管治危機就係中央意願與香港民意大有距離的結果。港大中大所做嘅民意調查皆發現越是教育程度高，越是年青嘅市民，對中央和特區政府，越是不滿意，神離貌不合，而特區政府無意在政治上有任何讓步，死局也！