近日聽到香港有人使用「暴民」二字，到底何謂暴民？「暴民」喺外國足球界好常見，正確啲該叫「足球流氓」。據網上資料顯示，𠵱班暴民有以下行為：一，冇武器嘅肢體衝突；二，周圍吐口水；三，蓄意投擲大量物件，無論係向球場定向警察 （講嘅係10個有9個掟；10,000人有兩、三個掟唔算！) ；四，手持木棍、玻璃樽、甚至汽油彈等；五，就算冇武器，煙花火種都肯定唔少得。
按此定義，上述人士指嘅所謂「暴民」，冇樣有份嘅？香港「暴民」睇嚟明顯跟唔上「國際標準」！不過咁，香港好多嘢都未必跟國際標準，所以一樣要催淚彈狂發、橡膠子彈侍候。
足球流氓喺歐洲係重大議題，有社會學專科研究。咁外國點對付足球流氓？荷槍實彈嘅防暴警察、催淚彈、水炮等少不免。但最想講係喺日韓世盃，英格蘭喺日本踢首場分組賽，大批英球迷按慣例開賽前飲到酩酊大醉，浩浩盪盪衝向球場；當英記者期待球場預備了何種規格嘅防暴警察嚴陣以待時，竟發現日本會方安排維持英球迷秩序嘅，係一班女子學生！個個整齊制服、笑容親切咁指示英球迷區位置；而奇蹟地，𠵱班醉酒佬竟然因此聽話咗！既然當局咁擔心公眾秩序，不妨今日起撤走所有警察，換上大批日本女生喺各區駐守。
方柏翹
now足球評述員