家陣香港馬主嘅生力軍，多數係商人家族富二代，但有一位身份比較特別，就係今期第九場「萬馬奔騰」馬主主教山團體成員馬志成。
馬志成好後生得36歲，喺香港商界同政界，大家會比較陌生，但喺澳門就甚有地位，佢阿爺乃已故全國政協副主席馬萬祺，換言之馬志成係紅三代。馬家喺澳門有唔少生意，馬志成亦有唔少公職，更係澳門立法會委任議員，話唔定過多十幾二十年，有望成為澳門特首。
主教山團體成員幾乎全部姓馬，佢哋首度進軍香港馬圈，即有運引入一匹好馬，「萬馬奔騰」雖然在港未勝，但六次上陣五次上名，上季曾與公認大大大超班嘅「戰利品」串Q；到咗今季亦持續進步。上仗季內初出，跑明顯嫌短嘅1000米直路賽，只係輸畀路程專家「十二門徒」屈居亞軍，熱完身今次跑番最擅長嘅1400 米，睇嚟呢位紅三代，唔單止喺澳門有Power，喺香港馬場亦可以威番一次。