內地著名導演張藝謀老婆陳婷，噚日正式開啟微博，佢示威咁貼咗一張一家五口嘅相，呢次係張藝謀三名仔女首次曝光，張導演之前就因為超生被內地政府罰咗748萬人民幣。
陳婷話噚日係佢嘅生日加上同張藝謀嘅結婚紀念日，佢慨嘆話：「十幾年的感情在有些人眼裏竟然成了眼中釘。」所以喺呢個特殊日子有嘢想講，陳婷話：「家庭的幸福，老人的健康以及孩子的茁壯成長，是每個人的願望，我們每天也都在為這些努力着！但殘酷的事實告訴我並不是每個人都願意這樣祝福我們！」
陳婷話就算用盡全力嚟保護家人同細路仔，都有人千方百計咁想破壞佢哋嘅平靜喎。陳婷認為既然係咁就索性開微博，與大家分享真實生活點滴。
宣示主權
相信陳婷咁做係要闢謠同宣示主權，因為之前有報道話張藝謀同《歸來》21歲嘅新人張慧雯傳緋聞，又有人話指張藝謀好似過緊獨居生活咁冇家庭歡樂喎。
有網友就發文讚張藝謀三個小朋友嘅衣着打扮樸素，更讚陳婷「把三個孩子撫養大很不易，願我們所有媽媽都能幸福……」
撰文：馮仁昭