英超紐卡素又輸一場，禮拜一晚作客以0:1輸咗畀史篤城，排緊尾2。領隊柏度話呢兩日會同班主艾殊利傾吓對策，而我求大俠估計，最大機會都係柏度落台，先可以平息「喜鵲」球迷嘅憤怒！
48小時內開照肺大會
輸埋畀史篤城，紐記開季6戰3和3負，係叫得球多過般尼先壓住後者排緊尾2。柏度個飯碗差唔多跌到落地咁滯，心知大件事嘅佢賽後都承認會同班主艾殊利緊急見面，商討對策，「我仲可唔可以留喺度，暫時都係問號。我會喺呢兩日同艾殊利認真嚴肅去討論一吓。我哋唔可以再輸落去，要探討吓解決方法。𠵱家一切都唔到我控制，但我係個專業嘅領隊，一日有約在身，我都會繼續帶隊。我知好多球迷插我、寸我、恥笑我，但我會面對同埋令自己成長。」柏度話就話開會係大家有商有量，實現成績反彈，但係人都知呢個係照肺大會，只有艾殊利一個講晒，佢亦好可能順便炒埋柏度。英國傳媒仲同艾殊利計埋數，話如果佢要炒仲有6年約嘅柏度，就要賠500萬鎊（約6,300萬港元）喎。
英國《太陽報》算係好畀面柏度，大字標題話佢有48小時挽救自己份工，但我求大俠睇嚟，佢點求情都冇用，似係48小時內會被炒多啲囉。好似博彩公司威廉希爾嘅下位被炒英超領隊賠率入面，柏度就理所當然做咗大熱門，只得1.17倍，而喺下場聯賽前被炒嘅賠率有1.67倍，佢仲可以留低喺下場對史雲斯督師就有2.1倍，睇嚟莊家都睇死柏度呢兩日被炒硬。
舞王高治雙手扮雀仔
至於日前有傳媒爆出紐卡素中場迪奧迪有兩個老婆兼一個情婦，享齊人之福；可能受報道影響，佢呢場踢得唔好，但英國《太陽報》引述迪奧迪身邊人士指，呢位科特迪瓦悍將覺得完全冇問題。另外，今場一箭定江山嘅史篤城前鋒高治，入波後跳晒雀仔舞慶祝，即係用兩隻手扮雀仔，唔知係咪笑緊「喜鵲」成績差呢。不過，高治跳舞早有前科，佢以前幫英格蘭入波後，都試過跳機械人舞慶祝，仲俾球迷笑咗好耐㖭。
識睇，一定係睇足英台【英波Live】：
http://soccer.appledaily.com
http://bit.ly/engballlive