呢幾年來，我都跟住Happy哥睇住呢間金融公司，我認我啲銅臭味，由內而外咁散發。所以為咗上位，我誓死效忠Happy哥。好在，滬港通十月會開通。
呢一日，Happy哥叫咗我入房，睇佢眼神，就知Happy哥真係好Worry「爆Gag，我有一堆收租股，蟹咗，你可唔可以幫我搞掂佢！」
家下又少自由人，又佔中，要吹起，係難，但難我爆Gag唔到，「冇問題啦，包喺我身上！」Happy哥見到我咁有信心，堂眉皺一皺，抱有懷疑，「搞得掂，一定唔會少得你嗰份。」
如是者，過2日，Happy哥嗰幾隻股升到澎澎聲。Happy哥又叫我入房，佢今次人如其名，真係好Happy！佢微笑，「你係點做到架？」
「多得一國兩制。」呢個時候，Happy哥面色一沉！「衰仔！一國兩制，依家仲邊有一國兩制，我呢啲古惑仔冇咩讀過書，但我都知係大話！你仲要多謝一國兩制，食懵咗你呀！如果真係有一國兩制，就唔會有嗰87粒催淚彈啦，你講起我都眼濕濕。你講呢咁嘅嘢，我唔止Unfriend你，你以後唔好跟我！」
估你唔到呢？古惑仔都有熱血嘅時候，仲要講到「Unfriend」添。的確，近期應該係香港facebook有史以來，Unfriend數字最高嘅時候。不過，我其實好開心香港facebook有罵戰，最怕以後連罵戰都唔可以有。
「Happy哥，聽埋我講先。你唔見港股、美股、日股，全部都因為佔中而跌，但偏偏A股不單止冇跌，仲有得升，你唔覺得奇咩？」Happy哥再皺一皺眉，「咁關一國兩制咩事先？」
「你睇下大陸，根本搵唔到『佔中』呢兩隻字，就算港股跌到扒街，都只係話『因受事件影響』。仲有呀，928嗰日，87粒催淚彈周圍飛，但大陸啲網，只係報一單咁嘅新聞。」我將手機遞上前，屏幕上大字標題：「香港萬人慶國慶，支持依法普選」。Happy哥拍枱，「你同我講萬人慶國慶？你不如話上街有幾萬人，受國慶氣氛感動流淚！真係『ke now yeah』！」
「所以佢哋根本就唔會知香港情況，示威有幾大規模，咁我咪同班大陸客講，就快滬港通，依家啲收租股平咗，又有息收，去到滬港通開波先買就遲架啦。係咪醒呢？」
多得「佔中」，先令我睇到未來嘅新一條財路，我更加要多謝，李小加引一班水魚經滬港通落嚟。而呢班水魚之所以成為水魚，正正就係多得阿爺嘅資訊封鎖。趁香港仲有呢個優勢，我真係要好好珍惜，有得玩，玩盡佢。
by千頌C@堆填區
http://fb.com/winbigwok